Gizartea -
EMAKUMEEN KONTRAKO INDARKERIA
Espetxera bidali dute Donibane Lohizunen hilda aurkitu zuten emakumearen bikotekidea
Ipar Euskal Herriko Mugimendu Feministak deituta, manifestazio jendetsua egin zuten atzo Donibane Lohizunen, hilketa matxista salatzeko. Frantziako Justiziaren "arduragabekeria" salatu eta "erantzunkizunak" eskatu zituzten.
IDOIA ALBERDI ETXANIZ | EITB MEDIA
Donibane Lohizuneko (Lapurdi) hotel batean, joan den ostiralean, hilda aurkitu zuten emakumearen bikotekidea espetxeratzeko agindua eman zuen atzo epaileak, deklarazioa hartu ostean. Orain arte zabaldutako informazioaren arabera, hilketa delitua leporatu diote 37 urteko gizonezkoari.
Indarkeria zantzu bortitzekin aurkitu zuten gorpua, hoteleko logela batean. Atzo egin zioten autopsia, eta horren emaitzen zain, Jerome Bourrier Baionako fiskalak aurreratu zuen hilketa "basatia" izan zela.
Hilketa matxista salatzeko, Ipar Euskal Herriko Mugimendu Feministak deituta, manifestazio jendetsua egin zuten atzo Donibane Lohizunen. Frantziako Justiziaren "arduragabekeria" salatu eta "erantzunkizunak" eskatu zituzten.
Ikertzaileek uste dute "aurrez pentsatuta egindako hilketa" bat izan daitekeela Donibane Lohizunekoa. Kasu horietan, biziarteko espetxe zigorra aurreikusten du Frantziako legediak.
Duela bi aste, apirilaren 14an, Ziburuko hotel batean balkoitik "erori" eta larri zauritu zen emakumea da ostiralean hilik aurkitu zutena. Orduan ere, atxilotu zuten gizonezkoa, eraso matxista leporatuta, baina aske utzi zuten, hipotesiari eusteko froga faltagatik.
